ശഫീഖ് ചുള്ളിപ്പാറ
നീറുന്ന നെഞ്ചിന്‍റെ രോദനങ്ങളാണ്
ശൈത്യത്തെ തളര്‍ത്തിയത്.
കരയു മനസ്സിനെ,
നിറഞ്ഞ പുഞ്ചിരിയാണ് മറച്ചത്.
എന്‍റെ ജീവിതത്തിന്‍റെ
മുനയൊടിച്ച കലിതീര്‍ത്ത വരികള്‍
ഹൃദയത്തിനേറ്റ മുറിവുകളാണ്.
പാതി നരച്ച സ്വപ്നങ്ങള്‍
വേനല്‍ കവര്‍ന്നതാണ്.
പ്രണയത്തിന് പ്രാണന്‍ പകരമുണ്ട്.
നോവുകള്‍ക്ക് പകരമെന്തുണ്ട്?
ഒളിയമ്പുകള്‍ പിഴച്ചതായിരിക്കണം
വദനകാന്തി കെടുത്തിയത്.
വിരഹ നൊമ്പരം ജീവിതഭാരമാണ്
ഇനിയെന്‍റെ അധരങ്ങള്‍
നിറഞ്ഞു ചിരിക്കില്ല.
ഹൃത്തടം സ്നേഹം കൊതിക്കില്ല.
സ്നേഹം ചതിച്ച
പാഴ്ജീവിതം സാക്ഷി.
ഇനിയൊരു തിരിച്ചുവരവില്ല.