ജീവിത യാഥാര്‍ത്ഥ്യം തേടിയലഞ്ഞവരുടെ
പാദങ്ങള്‍ പതിഞ്ഞ തുരുത്തുകളും,
വാററ്റ ചെരുപ്പുകളും കാണാന്‍
നിന്നെ ക്ഷണിക്കുന്നു.
നീ വരുന്പോള്‍ വഴിയോരത്ത്
സാന്ത്വനത്തിന്‍റെ തുരുത്തും തേടി
അലഞ്ഞവരെയും
വിടരും മുന്പേ വാടി കരിഞ്ഞവരെയും
ചാടി കടക്കാനുള്ള കയങ്ങള്‍ കൊണ്ട്
ഞെട്ടിത്തിരിഞ്ഞ്, നോക്കു കുത്തി പോലെ
നില്‍ക്കുന്നവരെയും കാണാം.
എങ്കിലും നീ വരിക.
ഈത്തപ്പനകള്‍ പൂക്കുന്ന, ഒട്ടകങ്ങള്‍
കൂട്ടമായി മേയുന്നിടത്തേക്ക്
നീ വരുന്പോള്‍,പണം നല്‍കി
സ്നേഹം യാചിക്കുന്നവരെ
കാണാതെ പോവരുത്
നീ വന്നാലും എന്നെ കാണില്ല.
പ്രതീക്ഷകളറ്റ, നിറം മങ്ങിയ
കണ്ണുകളും നടന്നറ്റുപോയ
പാദങ്ങളുമല്ലാതെ.